Фестываль інтэлектуальнай кнігі

ПРА НАС

БЕЛАРУСКІ ФЕСТЫВАЛЬ ІНТЭЛЕКТУАЛЬНАЙ КНІГІ PRADMOVA І ВЫСТАВА-ПРОДАЖ КНІГ БЕЛАРУСКІХ І ЗАМЕЖНЫХ ВЫДАВЕЦТВАЎ

Фестываль “Pradmova” ёсць найперш месцам сустрэчы: беларускай кнігі з яе чытачамі; лідараў думкі і майстроў слова са сваёй аўдыторыяй; класікі з яе новым прачытаннем і актуалізацыяй, культурных інавацый з адэкватнай ацэнкай і пашырэннем, а саміх беларусаў, незалежна ад сённяшняй лакацыі, з уласнымі мовай і культурай як крыніцай самапазнання і самапавагі, перад выклікамі новага часу, у еўрапейскім і сусветным кантэксце, у свабоднай творчасці, у дыялогу і паразуменні.  

Таму наш фестываль – гэта больш, чым “забаўляльны фармат” або супольнасць тых, хто любіць спажываць “разумныя кнігі”, але гэта і не элітарны клуб, куды заказаны ўваход тым, “хто не цягне”. Гэта хутчэй шырокая культурніцкая ініцыятыва, якая імкнецца праз рэалізацыю ўласных мэт і задач, уцягваючы ў іх вырашэнне розныя супольнасці і генерацыі, садзейнічаць глабальным мэтам развіцця нацыі і краіны, каб беларуская культура ўрэшце заняла “свой пачэсны пасад” сярод іншых культур Свету.

Нашы галоўныя каштоўнасці, якія мы вызнаём самі і да якіх шчыра заахвочваем нашых удзельнікаў і гасцей, гэта перадусім свабода слова і творчага самавыяўлення, пашана да культурнай разнастайнасці, узаемная салідарнасць і недапушчальнасць дыскрымінацыі у дачыненні да ўсіх людзей або груп, павага да нацыянальных традыцый і шанаванне годнасці і адказнасці за сваю краіну і культуру, імкненне да экспертнасці і інтэлектуальнага лідарства як агульны гарызонт перспектыўнага развіцця беларускай культуры і грамадства. Мы выступаем супраць таталітарных і дэструктыўных ідэалогій, якія транслююць ідэі нянавісці і гвалту.

Падзяляючы гэтыя каштоўнасці, мы імкнёмся з іх дапамогай спрыяць пабудове сваёй краіны як дэмакратычнай, еўрапейскай, чуллівай да абароны правоў чалавека, нацыянальнай і інклюзіўнай, то-бок такой, якая захоўвае безумоўную павагу да нацыянальнай годнасці і спрыяе развіццю беларускай мовы і культуры, здымаючы штучныя абмежаванні і абыякавасць у дачыненні да ўласнай традыцыі, не прыніжаючы, аднак, іншыя народы і культуры, а паслядоўна далучаючы Беларусь да сусветнай спадчыны. Мы дбаем пра будучую беларускую дзяржаву, якая, у тым ліку праз нашы супольныя высілкі, мусіць стаць краінай высокага спажывання культуры, дзе большасць прагне далучацца да яе дзеля самаўдасканалення і развіцця, а грамадства мае быць пазбаўленым ксенафобіі і дыскрымінацыі ў дачыненні да любых груп насельніцтва, даючы належнае месца сваім выбітным дзеячам культуры і інтэлектуалам як тым, хто непасрэдна фарміруе вобраз будучыні і задае асноўныя трэнды грамадскага жыцця. 

Мы бачым у беларускай інтэлектуальнай культуры адзін з галоўных рэсурсаў паспяховага развіцця дзяржавы і грамадства, лічым, што развіццё мыслення і грамадзянскага актывізму, у тым ліку беларусаў, якія апынуліся па-за межамі сваёй краіны, будзе спрыяць вобразу паспяховай нацыі і дасягненню значных мэт устойлівага развіцця. Мы прагнем бачыць у будучыні інтэлектуальную Беларусь і ўважаем за патрэбнае рушыць да гэтага ўжо сёння.

Мы імкнёмся да павелічэння прэстыжу беларускай культуры, росту бачнасці і значнасці кнігі, “што вучыць думаць”, спрыяючы паразуменню і ўзрастанню павагі да нацыянальнай ідэнтычнасці, ствараючы прастору, дзе кожны мае магчымасці для самарэалізацыі і творчага выяўлення ў бяспечным і спрыяльным асяроддзі. Наша мэта максімальна садзейнічаць далучэнню да нацыянальнай і сусветнай культуры, павышаючы інтэлектуальны ўзровень аўдыторыі, дбаючы пра ўстойлівасць развіцця уласнай культуры і грамадства і ўзмацненне пачуцця гонару за сваё як вартае прадстаўляць Беларусь у вачах іншых нацый і культур.

З улікам таго, што кніга – гэта з’ява комплексная, якая ўвасабляецца ў культуры чытання, ілюстрацыях, дызайне, тэатральных пастаноўках і экранізацыях, інтэлектуальных медытацыях і забаўляльных інтэракцыях, мы імкнёмся спалучаць усе гэтыя жанры і формы культуры ў межах фестывальнага фармату, аддаючы належнае першаснай літаратурнай форме кнігі і развіваючы астатнія яе вымярэнні. Таму мы ладзім кніжныя выставы і праводзім конкурсы рукапісаў, ажыццяўляем тэатральныя і кінапаказы, праводзім конкурсы і выставы ілюстрацый, дбаем пра важныя інтэлектуальныя дыскусіі, а таксама даём прастору для кожнага і кожнай, хто жадае праз уласную творчасць узбагаціць культурны патэнцыял краіны.

 

Беларускі фестываль інтэлектуальнай кнігі PRADMOVA адбыўся пяць разоў:

  • 2018 – праходзіў з 27 па 31 траўня у прасторы ОК16 (Мінск, вул. Кастрычніцкая, 16);
  • 2019 – праходзіў у Мінску, Брэсце, Полацку, Гродна, Гомелі і Бабруйску;
  • 2020 – праходзіў у Мінску, Брэсце, Віцебску, Гродна і Бабруйску;
  • 2022 – праходзіў у Варшаве, Вільні, Кракаве і Тбілісі, таксама была анлайн-праграма.
  • 2023 – праходзіў у Варшаве, Вільні, Беластоку і Батумі, таксама была анлайн-праграма.

Maryna Kazloŭskaja
Maryna Kazloŭskaja
Публічная спікерка
Літаратуразнаўца, перакладчыца
Paviel Barkoŭski
Paviel Barkoŭski
Публічны спікер
Філосаф, кандыдат навук
Andrej Chadanovič
Andrej Chadanovič
Публічны спікер
Паэт, перакладчык, блогер
Taciana Niadbaj
Taciana Niadbaj
Публічная спікерка
Паэтка, старшыня Беларускага ПЭНа